అంతా శాస్వతం అన్నీ శాశ్వతం 
అనుకోవడం లోనే ఉంది చిక్కంతా
ఏదీ శాశ్వతంగా అలాగే ఉండిపోదు
ప్రతీదీ మారుతూనే ఉంటుంది
ఒక సంతోషం ఒక సంబరం
అలాగే ఉండి పోవు
ఒక దుఖశకలం ఈ రోజు కాల్చేయొచ్చు
రేపటికి ఒక రోజు గడిచిపోయిన దుఖం
ఒక నదిలో తాగిన నీటినే రెండోసారి తాగలేవు
హిమాలయాల్లో మంచు నిశ్చలంగా కనబడుతుంది
కానీ కరుగుతూనే ఉంటుంది
కొత్త హిమం చేరుతూనే ఉంటుంది
ఈ రోజు చూస్తే ఎర్రటి కిసలయం
రేపటికి ఆకుపచ్చని పత్రం
ఈ రోజు నీ వయస్సుకి
రేపటి నీ వయస్సుకి లోటు ఒక రోజు
మార్పే జీవన నాదం
మార్పే అభ్యుదయానికి అసలు చిరునామా
శిలాజంలా ఉండిపోవడం
చాలా చింతించాల్సిన విషయం
మార్పుతో చెట్టాపట్టాల్ కట్టి చూడు
మహదానందానికి అదే కాలిబాట.