సారా వ్యతిరేకోద్యమం కాలంలో వచ్చిన దీపావళి రోజున సత్యభామను తెలుగుభామను పోల్చి నేను వ్రాసిన కవిత 1992 అక్టోబర్ 8 న ఆంధ్రప్రభ లో ప్రచురితమైనది ... 23 సంవత్సరాల తర్వాత ఆ కవిత ఈ దీపావళి వేళ  మీ కోసం ...
సారాసురసంహారం
----------------------
అందరికి వందనాలు
అభినందన చందనాలు
అందుకోండి దీపావళి
శుభోదయపు వందనాలు
ద్వాపరయుగంలో ...
నరకాసురుని చెడు ఆగడాలు
అధికం కాగా ...
నాడు సత్యభామ
చెడుపై సమర శంఖం పూరించింది
నరకాసుర సంహారం చేసి
భూభారం తగ్గించింది
కలియుగంలో ...
సారాసురుడు సంసారాలు
కబళిస్తుంటే ...
నేడు తెలుగుభామ
మద్యనిషేద మహోద్యమం లేపింది
సారాసుర సంహారానికి
సమధికోత్సాహం తో కదిలింది
సారాసుర సంహారం
సత్వరమేఅవసరం
మహిళా ఉద్యమం
మతాబులా జ్వలిస్తుంది
తారాజువ్వల స్థానంలో
సారాజువ్వలెగురుతున్నాయ్
నినాదాల ధ్వని ముందు
టపాసులు వెలవెల బోతున్నాయ్
ఓ ప్రభుత్వాధి నేతలారా
మహిళల కోరిక మన్నించండి
మద్య పానాన్ని నిషేధించండి