కుర్చీల మహిమలు ఆ కుర్చీ లంటే అంత మోజు అందుకే మరి! ఆ కుర్చీ లెక్కగానే ఎన్ని మహిమ లొస్తాయో! ఉత్త ఇసుకనుండి ఎంత తైల మొస్తుందో, గాలిలో మేడలు కడితే ఎంత డబ్బు ఒళ్లో వాలిపడుతుందో... ఎవడు రోడ్లు వేసినా అందులోంచి నాలుగు రాళ్లు వాళ్ళవే, ఎవడు ఇల్లు కట్టుకున్నా అందులోంచి నాలుగు ఇటుకలు వాళ్ళవే, ఎవడు ఏ పని చేసినా, ఏమని ఏ "మనీ" తీసుకున్నా అందులోంచి కొంత అదృశ్యంగా వాళ్లనే వరిస్తుంది... నదులు వాడి పెంపుడు కుక్కలవుతాయి, కొండలు వాడు కాళ్ళు తుడుచుకొనే పట్ట లవుతాయి, గాలి వాడి చుట్ట మవుతుంది, నిప్పు వాడి నేస్త మవుతుంది... ఆ కుర్చీ లంటే అంత మోజు అందుకే మరి! ఆ కుర్చీ లెక్కగానే అన్నీ వాడి సొంత మవుతాయి... నీ వోటును వాడు నోటుగా మార్చేసాడు, పైగా వా డంటాడు నీ ఓటు రేటు పెంచటానికే పంచభూతాల్ని నోట్లుగా మార్చుకుంటున్నా డట! ఒరే నాయనా, అది నోటు కాదు- నీ నోట్లో కుక్కుతున్న మత్తు బిస్కెట్టు, నీ బుర్రను చెడగొట్టే ఒక తియ్యని విషం బొట్టు... నాలుగు రోజులు పొతే చాలు నీవు నిలబడటానికి నేల కనబడదు, తాగటానికి నీరు దొరకదు, పీల్చటానికి గాలిలో ఆక్సిజన్ ఉండదు, తినబోతే పరమాన్నంలా కనిపించే గరళం, చావబోతే చంపకుండా నరకం చూపించే కల్తీ ఔషధం... మన కళ్ళ ముందే వెధవలు ఎలా కొట్టుకుంటున్నారో చూడు, ఆ కుర్చీల కోసం ఆ మహిమల కోసం మనల్ని నోటులా మడత పెట్టి ఎలా పర్సులో పెట్టుకుంటున్నారో చూడు... ఒక్కసారి కళ్ళను పీకి సరిగ్గా నాటుకోవడం నేర్చుకో నీకు, నీ ముందు తరాలకు చూపు జాగ్రత్తగా పెంచుకో ఓటును మాంఛి పదునైన కత్తిలా మార్చు, వాడిని వాడి గణాల్ని వాడి భవిష్యత్తును నిర్దాక్షిణ్యంగా తెగటార్చు!