కలిమి కలిగినట్టి కడు లోభి యాతండు తేనెటీగవోలె తెచ్చి జేర్చు అనుభవించలేని యా సంపదేలరా? నారసింహ తనయ! సార హృదయ! కష్టములకు నోర్చి కార్యశీలివి గమ్ము ఫలము గోరకుండ పదము కదుపు కాలగతియె యిచ్చు మేలగు గుర్తింపు నారసింహ తనయ! సార హృదయ! స్థిరత కలిగియుండు సరళరేఖ యెపుడు వేల మీర దెపుడు వృత్తరేఖ పగిదిలేని దెపుడు వక్రంపురేఖయే నారసింహ తనయ! సార హృదయ! చెవుల పొందు జేరి చెలగు వాక్కును బట్టి పరిహరింత్రు కంటపడ్డ యదియు చూపు కంటె మాట చుట్టమాయెను గదా! నారసింహ తనయ! సార హృదయ! సహనవంతుడెపుడు సాధించు సర్వమ్ము యోర్మి లేని వాడు యోడి పోవు సహన మొకటె కూర్చు సర్వార్థ సిద్థిని నారసింహ తనయ! సార హృదయ!